Барилгын ханган нийлүүлэгчдийн зөвлөлөөс Монгол улс дахь Канад улсын Элчин сайдын яамны Худалдааны ахлах төлөөлөгч, элчин зөвлөх Жэймс Кимтэй 2023 оны 08 сарын 30-ны өдөр уулзалт зохион байгууллаа.

         Тус уулзалтаар хоёр улсын барилгын салбарын ханган нийлүүлэгчдийн хамтын ажиллагааг өргөжүүлэх, туршлага, мэдээллээ харилцан хуваалцах зэрэг сэдвээр санал солилцсон ба Канадын худалдааны төлөөлөгчийн албаны зүгээс Канад улсын дэлхийд тэргүүлэгч, байгаль орчинд ээлтэй, эрчим хүчний хэмнэлттэй, ухаалаг барилгын технологи болон дэлхийн жишиг болсон ногоон барилгын материалыг сонирхсон аж ахуй нэгж байгууллагуудыг дэмжиж, судалгаа мэдээллээр ханган, хамтран ажиллахаа илэрхийллээ.

     Мөн Ноён Жэймс Ким  хэлэхдээ “Канад улсын худалдааны төлөөлөгчийн алба нь 1895 оноос хойш Канад улстай арилжаа худалдаа эрхлэхэд дэмжлэг үзүүлж ирсэн төрийн байгууллага бөгөөд дэлхийн өнцөг булан бүрт байрлах албадаараа дамжуулан бизнесээ өргөжүүлэх, бизнесийн найдвартай түнштэй болохыг хүссэн ОУ-ын компаниудад нээлттэй үйл ажиллагаа эрхэлдэг байгууллага юм. Монгол Улсын барилгын салбарын ханган нийлүүлэгч байгууллагуудыг Канад улсаас стратегийн худалдан авалт, хөрөнгө оруулалт, инновац болон барилгын ханган нийлүүлэлтийн салбарт түнштэй болох боломжийг нэмэгдүүлэх, тэдэнтэй холбох гүүр нь байх болно” гэлээ.

Канад улсын барилгын материал нь дэлхийн хамгийн эрс тэс уур амьсгалд тэсвэртэй байхаар халуун хүйтэн цаг уурын нөхцөлд туршин үйлдвэрлэдэг, онцгой чанараараа дэлхийд танигдсан. Тэдний дэлхийд тэргүүлэгч туршлага, шийдлүүдээс дурдвал: 

-Ногоон барилгын материал

-Эрүүл барилга

-Ухаалаг барилгын технологи

-Модон барилга

-Халаах, хөргөх технологи

-Ногоон инженерчлэл

Канад компаниуд төр хувийн хэвшлийн түншлэл, төсөл хэрэгжүүлэлтийн туршлага, үйл ажиллагааны зөвлөх үйлчилгээ үзүүлдгээрээ нэртэй бөгөөд ёс зүйт үйл ажиллагаа хэрэгжүүлэхийн зэрэгцээ, төсөв төлөвлөгөөг зохих ёсоор хэрэгжүүлдэг чанар нь Канад компаниудын давуу тал юм.

Канад улсын дэлхийд тэргүүлэгч, байгаль орчинд ээлтэй, эрчим хүчний хэмнэлттэй, ухаалаг барилгын технологи болон дэлхийн жишиг болсон ногоон барилгын материалыг сонирхсон аж ахуй нэгж байгууллагууд БХНЗ-ийн bxnztbb@gmail.com хаяг болон 99099138 утсаар холбогдон дэлгэрэнгүй мэдээлэл авах боломжтой.